ZMHSS nung Parents’ Day amung

Dimapur, Yimpoksüi/November 18 (TYO): Zakiesato Memorial Higher Secondary School, Dimapur nung Parents’ Day sentong ayonga mungogo. Iba sentong nung District Nodal Officer (NTCP), Dr C Tetseo tetushi tesemdanger ama jaoka liasü.
Sentong nung o jembiba mapang Dr Tetseo-i, tsüraburtem nem tetushi agütsütsüsa school-i iba sentong ayongzükba asoshi pelaba metetdaktsü.
School nung kaketshirtemi tangazüktsü tim kaket shisatsü ayimjema angazükdar, ajiasünung tsüraburtemi pei chirnurtem asoshi khuret abentsü kodanga mamatsüla, ta Tetseo-i tsüraburtem dang ashi.
Tsürabur karibo pei tanur school nung anioktsür (admission) sülen, onok teinyaktsü ajak inyakogo aser tanüngba ajakji school-i reprangtsü ta bilemer, ta Tetseo-i ashi. Iba olen den külemi paisa, tanü putu nung shisaliok bushibaji taküm lenla ajak nung ayimjemba ka lir, anungji tanurtem shisaliok renlokba nung tsüraburtemi shilem tulu agitsüla, ta ashi.
Khuret ajakji school nem dang menungloktsütsüla, ta Tetseo-i tsüraburtem dang ajang ajanga ashi.
Tatalokba ka nung atishia, Tetseo-i, tanur reprangtsüji tetsü ka khuret dang masü saka tsürabur anaprongla dak khuret kasa lemzükja lir. Iba olen den külemi, paisa, tebu kati pei tanurnem tekümzüktsüba mesüra senotsü aser chiyongtsü agütsübaji dang masü saka pei tanur dak temulungjang den shisatsü tesendaktep aser tamang alitsüla, ta ashi.
Kibong nung tanurji tsüraburi (tetsü o tebu) nendaka mereprangra, tanurji tim masüba lenmang ka nungang aintsü ana nung lir. Anungji, pei tanurtem dang tatishitsü tajung sayua anitettsü asoshi Tetseo-i tsürabur nem tajungshiba agutsü.
District Nodal Officer, Tetseo, shiba tesayur ka liasü, pai, school nung tesayurtemi tanurtem atema khuret bena kaketshisatsü sayutsü metetdaktsü.
Sentong tetenzüklen iba schook Coordinator, Joyson Shimray-i school renloktsü asoshi tsüraburtem nungi teyari meshia liasü. Paisa tsüraburtem dang pei tanur aser kaket reju nem temulung agütsütsü nenshia shisem.
Coordinator-isa sorkari shisaluyim sentong balala ayongba lemsatep aser tetsütem nem shisaluyim tali agütsütsü asoshi “Beti Padhao Beti Bachao” sentong agütsü indanga rasaa ashi.
Iba sentong nung tsürabur noklang aika dena tanurtemi shilem balala agiba temulung chia repranga liasü.