Zonal & Sector Magistrate coordination senden menogo

Kohima DC & DEO, Anoop Khinchi IAS-i, April 9 nü, election tetsükdaktsü makai agitettsü atema  Zonal aser Sector Magistrates tem den DC’s Conference Hall, Kohima nung sensaksemogo.

Dimapur, Rongchii/April 9 (TYO): Master Trainer den Zonal Magistrate aser Sector Magistrate coordination senden ka Deputy Commissioner Conference Hall, Kohima nung April 9, 2019 nü agiogo.
April 11 nü agitsü aliba Lok Sabha Election 2019 jung junga katettsü atema tatembangbuba tetuyuba agütsüba mapang Kohima Deputy Commissioner & DEO, Anoop Khinchi, IAS-i ashiba agi, Zonal magistrate tem overall in-charge asütsü saka election tebor junga agitettsü atema Sector Magistrate temia shilem tuluka agitsü.
Pai parnok dang pei tata polling station tem nung vote shinga nema memetetdaktsüi agütsütettsüsa voting compartment tem reprangshitsü aser maparen ajak tembanga inyaktsü tuyuogo.
DC & DEO-i Sector Officers tem dang pei tata polling station-i mao tsüngda election nung amshitsüba osettsüt aser form tongtibangtem ajak parnok polling team temi aben maben aji junga asadangtsü shiogo. Paisa Sector Officers atema vote agütsüba anogo tongtibangtiba mapaji mock poll asütsü kong Sector Officers temi mock poll 6:00 ako tashi nungbo tenzüka agitsüla aser mock poll takok ngua agiba sülen vote agütsüba maparen tenzüktsü, ta ashi.
Maneni DC-i parnok dang vote agütsüba anogo mezüngbuba ghonda ana tsüngda pei tata Polling Stations tem semdanga vote agütsüba maparen metetdaktsütsü ashi. Paisa Form 17C idang nenshia ashi, koba deposit asütsüla aser Presiding Officers tem dang nikongtsütsü 4:00 ako matong tashi Polling Station meshibangtsü ashitsüla ta metetdaktsü.
ADC Lithrongla Tongpi Rutsa, AEO Toshimeren aser Master Trainer, Chubayanger nungreia sentepa aliba ketdangsertem dang mock poll koda tongtibang iba indang metetdaktsü, kong maparen tinyaktsü aika lir aser EVM aser VVPAT nung timtem adokra idangjisa metetdaktsütsü ashi, ta Kohima DPRO sangdong ka ajanga metetdaktsü.