Zonipang S/A final-i iogo (Oct 25 nü 2nd semifinal Intermingle Vs Telongjem F/C na asayatsü)

MDFA football trophy Imkongmeren Sports Complex Mokokchung nung mezüng semifinal match Zonipang SA o SSS Yellow na tsüngda asayaba mapang tangokba noksa nung angur. Mokokchung, October 24, 2018. (Noksa Agir: Sashimeren Jamir)

Mokokchung, Mongputeni/Oct 24 (TYO): Mongputeni/Oct 24 nü MDFA trophy yangi Imkongmeren Sports Complex Mokokchung nung mezüng semifinal asaya Zonipang SA o Sports Society Soyim (SSS) Yellow na tsüngda asayaba penalty nung Zonipang-i goal 7-6 agi SSS madak takok tulu ngua parnok final asayatsü jenjang angazükogo.
Mezüng asaya tesadang nung SSS Yellow nungi striker Jersey No. 9 – Toshiwapang-i minute 19 dang or lia D-Box telung nungi goal tajung ka metsüoktsü. Aji sür, anisüngzük mapang atongtsü khenpika dang lia Zonipang puri free kick metsütsü maongka ngua ibaji metsüdang Zonipang striker Jersey No. 8 – Ketho Zhapo-i minute 43 nung tokolak agi tongoka goal tajung ka idakja goal kasasa kümdaktsü aser mezüng asaya tesadangji yangji tematok.
Anisüngzük mapang agir külen, tanabuba asaya nung telok anaprongi goal yoktsü aiben meranga asaya aser telok anaprongi goal yoktsüsa maongka nguaka shiangaia goal magütsüteti lemzüktsüba mapangji tembang. Iba asaya nung ball possession-ji telok anaprong sakuku tajung liasü.
Aji sür, tiebreaker mapang minute tenet-net (14 minutes) apuloktsür asaya saka yangjia telok shingaia goal magütsütet. Anungji, tesü penalty metsüteptsüsa kümatok aser iba nungji Zonipang puri goal 7-6 agi SSS madak takok ngua liasü. Tanü asaya reprangertem tanga mapang dang nungi teimba liasü.
Oct 25 nü nikongdang 1:00 ako nungi tenzüka tanabuba semifinal match Intermingle Club o Telongjem FC na asayatsü lemzükja lir. Iba asaya nung Match Patron asütsü Nagaland Football Coaches Association tir, Roko Angami jaoka lir.