Zoramthanga-i Thailand nung Myanmar telungpur den ajuruteptsü

Aizawl, July 4 (Agencies) : Myanmar nung telungpur teloktem aser Myanmar sorkar tsüngda yimjung yanglutsü nükjidong nung taoba Mizoram Chief Minister Zoramthanga tanü Thailand-i apusoa ogo.
Thailand nung oa pai Myanmar nung telungpur telok 16 nungi teshimtet nübotem den ajuruteptsü.
Zoramthanga ya taoba mapang Mizo National Front (MNF) tanishir ka liasü aser pai osangbener dang ashiba agi, “Myanmar nung telungpur teloktemi Myanmar sorkar sen olemtep linür aser 1986 küm Indian sorkar o taoba mapang telungpur telok MNF tsüngda Mizo Peace Accord agitepba osang tejangjaba nung metetnür.”
Thailand kübok Chiangmai aser Bangkok nung pai telungpur telok 16 nungi teshimtet nübotem den ajuruteptsü ta Zoramthanga-isa shisem.
Myanmar nung telungpur teloktemi taoba mitkari aniba sorkar dang nungi tang civilian sorkar dak tamang akar aser olemtep junga agitettsü ama imlar, ta paisa shisem.
Myanmar kübok Kachin, Karen, Chin, Wa, Arakanese aser Shan nungertemi pei pei talidak nüjiso atema rarar. Tawa tu Zoramthanga aser India nung National Security Adviser (NSA) Ajit K. Doval matsüngdang Myanmar nung telungpur telok kari sorkar den ceasefire agreement agiogo.