ZPM-i Angh dang MMHRB agizüktsü akhang

Aizwal, Yimpoksüi/November 28 (Agencies): Zoram People’s Movement (ZPM) youth wing-i, Mizoram Angh PS Sreedharan Pillai den ajurutepa Mizoram Maintenance of Household Registers Bill (MMHRB), 2019 agizüktsü atema temelaba agütsütsü mepishi.
Iba bill ajanga NRC mesükba inyakyim ka Mizoram nung benoktsü asoshi maongka agütsütsü. Iba bill ya taküm March ita 18 nü State Assembly nung agizükogo aser Angh temelaba ataba mapang ka lir. Iba bill agizükba mapang Assam Governor Prof Jagdish Mukhi Mizoram in charge liasü.
“Bangladesh nungi ozüng alema arurtem nokdangtsü atema onoki Mizoram Maintenance of Household Registers Bill, 2019 benoka inyaktsü asoshi temelaba agütsüdaktsüner, koba Mizoram Legislative Assembly nung March 18 nü ajaki mulunga agizükogo,” ta ZPM youth wing-i Angh nem tezüluba nung takhangba ka agütsüba nung shia lir.
Iba bill ajanga register ka benoka inyaksangshitsü meranger, kong state nung aliba nüburtem ajak tenüng aser noksa densema parnok jurila osang tejangja mangaoka ayutsü, koba Mizoram nung ozüng alema bendanger lia alirtem putettsü asoshi lir.
Ajisüaka iba bill benoker ita ti tashi nunga Angh-i temelaba agüja mali.
Mizoram ya Myanmar aser Bangladesh arrtsü nung lir, anungji ozüng alema bendanger state-i aitba ya küm aika tebilemtsü kaa arudar.
Bendanger aika senoka aitba aser permanent residents certificate agizükba ajanga state nung nütsüngyongsük kanga renlokogo aser temzüng ozüng tsütsüa tebilemtsü adoker.
ZPM Youth wing-isa, bendager nokdangtsü atema Angh dang arrtsü nung security akangshitsü asoshi khangogo. Maneni Bangladesh aser Myanmar den shishilembaba tsütsü tesendaktep tali tajungba küma yanglushitsü asoshi parnok Angh dang akhang.
Bru refugees tem dak sendakba nung parnoki ashiba agi, “parnok timba kati Mizoram-i meyipa maruner anungji parnok Tripura nung alitsü asoshi inyaksangshitsüla.
ZPM Youth-isa, Assam den arrtsü dak sendakba nung mangatettep adoka aliba bentettsü Angh dang khangogo.