ZPO-i tim nung ola adoker: NTC

Kohima, Monupii/May 10 (TYO): Monupii/May 11, 2018 nü state sorkari tribal tentettem den consultative senden ka ayonga aliba nung Zeliang People’s Organisation (ZPO) mezüngokba ajanga ZPO-i tim nung ola adokbaji NTC-i repranga atadar, ta tanü Media Cell, NTC-i sangdong ka ajanga metetdaktsü.
“ZPO jashibaji, Nagaland nung Zeliang tribe züngoka liaka consultative senden nung adentsü mejaok, ajisüaka Nagaland nung recognize masüba tribe, Zeliangrong bo Zeliang tribe tenüng nung senden nungji adentsü jaokogo. State sorkari inyakba mapaji Zeliang tribe recognize masüba den kasa asütsü aser Nagaland nung Zeliangrong ji tribe ka ama recognize asüba amai asütsü,” ta NTC-i metetdaktsü.
“State sorkari inyakba mapaji state nung scheduled tribes tarensen alema inyaker asütsü, aser iba ya tebilemtsü tulu ka lir aser timtem adoktsüsa lir. Anungji NTC-i state sorkar dang aibelena inyakbaji tekaraba nung metongshia Zeliang tribe nem tim akhüm aser temeden agutsütsü mepishir,” ta kasa sangdong ajanga metetdaktsü.