ZTE Axon M dual-screen foldable smartphone sayaogo

New York, October 18 (Agencies): Chinese mobile company ZTE-i US nung dual-screen foldable smartphone ka sayaogo, aser iba ya company atema ano alizüng tasen ka tongtetba lir.
Tang tasentiba smartphone, Axon M ya metong nung tasazük inch 5.2 lir aser screen anaji ‘fold’ asü nunga tang amshitepba smartphone den temelemji kasa dang asütsü, ta Xinhua osang ajanga metetdaktsü.
Tamshirtem atema iba phone nung unique modes asem lir.
Dual mode phone ajanga tamshirtemi screen anaprong nung apps balala lapoka amshitettsü. Tatishitsü agi, iba phone amshirtemi screen ka nung basketball game reprangtettsü ano iba den külemi screen ka nung tanga saipsaong reprangtettsü.
Ano kodang screen anaji ‘extend’ süra tablet screen nung video reprangba mesüra games asayaba ama amshitettsü.
Ano phone nungsa mirror mode keta lir, koba ajanga nisung ana tip balala nung mener screen ana nung video balala reprangtettsü.
“Axon M ya foldable smartphone category nung mezüngbuba phone lir,” ta ZTE Mobile Devices CEO, Lixin Cheng-i ashi.
Pai ashiba agi, iba phone ya China, Japan aser Europe linüktem nunga angutsü. Iba phone ya alima tesem balala nung ayoktsü atema ZTE-i AT&T, China telecom, jd.com aser NTT Docomo den partnership yangluogo.
November ita nungi tenzüka ita 30 tsüngda AT&T customer temi Axon M ya US sen 24.17 agi alitettsü.