Zubeen Garg nem Hindi ken metendaktsü

New Delhi, April 16 (Agencies): Assam nunger nüngtugu kentener Zubeen Garg-i “Bihu stage” ka nung Hindi ken atenba atema sentong ayongertemi anendaktsüba sülen stage toktsür luadok.
Iba tatalokba ya Hokolbarnü aonung liasü. Stage metoktsü tsüngda kenteneri sentong ayongertem dang kentener kati kechi oshi nung ken tener atentsü ta shia asaloktsü. Iba ama tim masüba o ashiba ya jangja jangjaa local channel tem nung angashia liasü ta osang ka ajanga metetdaktsü. Item channel temi iba sentong Live sayua liasü.
Garg aija sentong ayongertemi ashiba agi, pai Hindi ken matentsü ta molungteper liasü. “Iba event manager-i pa stage-i mato tsüngda pai Bihu stage ka nung Hindi ken matentsü ta tenangzükba agütsü,” ta Noonmati Bihu Sanmilan tir Madhu Ranjan Nath-i ashi.
“Pai iba tenangzükba raksa aser iba ajanga onoki kentenba anentsütsüsa aküm. Onok-i oshi kecha manemer saka Bihu stage ya Hindi ken atentsü asoshi masü,” ta paisa ashi.
Garg-i sentong tetenzükdang Assamese aser bihu ken kar aten aser iba sülen pai Krrish 3 film nungi ‘Dil Tu Hi Bata’ ken atentsü tenzükdang anendaktsü. “Parnoki kechiba kenteneba anendaktsüar ni mangateter. Hindi ya asen linük oshi lir…. Hindi, Assamese, Bengali aser ano tanga oshi kar; item ajak Sanskrit nungi dang poktet,” ta pai tatsüka lir ashi.