Zubza merüka ayutsü mapa tenzüker

Dimapur, April 13 (TYO): Lokti nung temelenshi atema inyaker, Niketu Iralu-i, senso shia asen aliba temeket tesemtem merüka ayutsüla, ta metetdaktsü.
Brihostibarnü Sechü Zubza Youth Organisation indang “Year of sanitation & plantation” sentong tenzüktsüdang Iralu-i asen aliba lima wazüka ayutsü ayongzük.
“Asen aliba lima aneptsütsü aser topor junga kümdaktsüba dak alaka loktiliba, yimtenren aser rongsenkettsüng tebilemtsü tuluba mali. Anungji loktiliba, yimtenren aser rongsenkettsüng tebilemtsütem dang nungibo asenoki asen aliba temeketji tongtibangtiba südaktsütsüla,” ta Iralu-i ashi.
Pa ya Centre for North East Studies & Policy Research, Guwahati & New Delhi nunga züngsem ka lir.
“Alima tzü-mopung tebilemtsü onüktem ya alima rangben atema tebilemtsü ka kümogo. Alima meimchirtemi Tsüngremi yangluba lima raksatsüra ibajibo tamachi mapa ka asutsü. Anungji asenok nisung shia asen aliba alima anepaluba nung shilem tajung agitsüla,” ta Niketu-i ashi.
SZYO-i ‘sanitation and plantation year’ ayongzükba atema pai lanurtem nem tenüngsang agütsü.
“Tesem apira, Sechü Zubza-i maongka aika agitettsü, aser asenok nem agütsüba maongka ajakji asenoki tajungtiba nung agitsüla. Khenkhenbo asenoki asen jakdang aliba tayongzükbatem amatoker sadoksadoka alir. Asenok ajak khuret abenba senso kaka kümdi aser terenlok kadi,” ta paisa ayongzük.
“Nai tangar nem tajungtiba agüjang, ibaji ajanga tangaria parnok tajungtibaji nü nem agutsütsü. Ibaji mesüka asenoki asen aliba alima nem tajungtiba agütsüdi,” ta paisa ashi.
SZYO-i alima tzü-mopung kümzüka ayutsü atema inyakbaji ajanga tangaria tatishitsü tajung agitsü imlar, ta paisa ashi.
Okila jembidang SZYO Tir, Viketouzo Meyase-i, iba sentong ya Sechü Zubza yim ya temerük akumtsü aser süngdonglidong jenti aliba yim ka kümdaktsütsü nükjidong nung inyaker, ta metetdaktsü.
“Iba omen kübok onoki ayong, ayongnutem aser riju balala densema yim telongtet ajak merüktettsü,” ta paisa metetdaktsü.
“Tanü nungi tenzüka iba yimtsüng nung alirtem aser yim ajanga senzür shingaia yimtsüng nung jana meintoktsü,” ta pai ashi.
Sechü Zubza yim merüktettsü ya mapa kanga tasak ka asütsü, kechiyong iba yim ya National Highway 29 nung lir, ta paisa shisem.
Iba senong tembangba sülen tongti tejaoker, Iralu-i jana intokba khang ka azüngtsü aser süngdong ka temja liasü. Kasa sentong nung SDO Civil, PHC medical officer aser Sechü Zubza police station OC nungeria süngdong kaka temja liasü.