Zubza train lenmang atema shisabulur

Dimapur, April 26 (TYO): Railway line aliba ajanga Dimapur ya ILP free zone ka lir aser iba ajanga ozüng alema aruba khuret tulu ajurua lir. Anungji, Zubza tashi train lenmang yangluba sülen ozüng alema arurtem noktangtsü atema kechi tebilemba lir? ta Central Nagaland Tribes Council (CNTC)-i asüngdang.
Nagaland kübok district ajunga nung Inner Line Permit (ILP) mapa tenzüktsü ola adoker aser sorkaria ibaji mulunga agizükogo, saka iba railway line ajanga ILP mapa inyakba nung tetsükdaktsü ajurutsü aser timtem bentsür arutsü ama bilemer, ta CNTC-i ashi.
Ali melena sen anguba mesüra iba railway line ajanga tajangzük bentsür arutsü ta teimla ayubatem jagi tarutsü Naga nunger tarutsü kümzüka meyutettsü. Zubza railway line ya rongsenkettsüng tsütsü takoksa angutsü ama bilemer, kechiyong anentsüh alua timtem ajurutsü aser four-lane lenmang yangluba ajanga lenmang kanga agia tatsüba akümtsü, ta parnokisa ashi.
Tanü putu nung railways ajanga terenlok bener arutsür ama züngshir saka Naga nunger nütsüng yongsük tsütsü reprangdangra, asen liyonga aotsüba nung lendong bentsür arutsü ama ajiteter. Anungji asen chirnurtem indang tarutsü asoshi lendong bentsür marutsütsü merangdi ta CNTC-isa metedtaktsü.
North east state ajunga den külemi Naga nungeri Citizenship Amendment Bill (CAB) anema noktak saka railway agi sendaktep nungbo asenoki ola adokbaji amajok akümtsü, kechiyong ozüng alema arurtemi asen state asüngtsü. Anungji, Naga nungertemi iba ama projects inyaktsüba nung jungjunga shisadangtsü nüngdaker, ta parnokisa shisem.