Zuchobeni-i atenba ‘Listen To Me’ ken sayatsü

Dimapur, December 11 (TYO): Zuchobeni Tungoe ya Nagaland nungi ken atentsü sempet tajung keta alir rongnung ka lir. Lai Nagaland nung jenjang tajung yangluogo aser tang ano jenjang tuluba asoshi mera tasen agitsü sentong lir. La ya tang Indihut nung shielm agir rongnung tanutsütila lir.

Zuchobeni Tungoe-i 2011 küm ‘Kids for Fame’ award anguba ajanga Naga nunger timba kati meteta aküm.

Tungoe-i ya tang arishi küm 16 aser par kibong nung tanutsütila lir. La arishi küm pezü asüdang nungi ken atentsü tenzük aser ken ajanga temulung raksar aliba aneptsüa menürem bener arutsür ta lai chichia amanger.

La mezüng lokti tulu nung shilem agibaji la küm trok asüdang la aliba tesem nung arishi küm trok asüdang shilem agiba liasü.

La kodanga music training magidang mesüra music school kecha nunga mezüngdang.

La kententsü sempet ya Tsüngremi odang maotsüba lir aser lai iba sempet mesamatsü mechi nung lai mejemba ‘Scar’ ken Clef Ensemble, Kohima nung menüngoka taküm May ita Indihut nung sayaogo.

Iba ken ajanga state nung kentener tajungtem ajungmesoa telangzüba tajung aika nguogo. La kensü ola tajung aikati junga agizükteter aser tushir. Indihut.com nung aliba ken rongnung lai atenba ken ya timba download asür.

Tungoe ya nüngtugu kentener Taylor Swift aser Ed Sheeran na den Nagaland nungi la asoshi kentener tajungtila ta lai züngshila, kentener tajung Shalo Kent nungeri ajungmesor.

Lai ano la meyong single ‘Listen To Me’ ken tan ita tatemlen mesüra January 2016 tetenzüklen sayatsü sentong lir.