Zuckerberg-i Delhi nung senden ka akatsü

Washington, October 17 (Agencies): Tan ita tatemlen Facebook ngutetsang Mark Zuckerberg-i India nunger den tesendaktep junga akümtsü asoshi Indian Institute of Technology (IIT) Delhi nung “Question & Answer” sentong ka agitsü. Pai, India nunger ji Facebook ajanga teti tongtepratepa aliba linük ka lir, ta social media ajanga tamalen khen lemsatepogo.
Zuckerberg-i, “India nung nisung million 130-i Facebook amshir. Facebook nung alima ajak dang tongtepratep tasüba nüburtem den sensak asemtsü asoshi ni kanga yongyar,” ta Delhi nung October 28 nü senden ka akatsü ashiba mapang Facebook post ka ajanga lemsatepa ashi.
Iba post nung pai, “Tasüngdangnüba kar lira ‘comments’ nung züluang aser ni Facebook ajanga langzütsü, iba den külemi IIT-Delhi nung sentong akaba mapanga langzütsü,” ta shia lir.
Taoba ita Palo Alto nung Zuckerberg-i India Ato Kilonser Narendra Modi den senden ka akatsü agizüka liasü aser iba mapang ‘Question & Answer’ session ka ka-a liasü.
“India ji ozü company asoshi kanga nüngdak. Iba otsü ya ni tangar den temai adoka mejembir aser nisung ishikati dang meteta lir,” ta Facebook ngutetsangi parnok headquarter nung September 27 nü ashi.