Zülujang aser zülumen

Asenoki English oshi züludang amshiba Roman zülujang ya ajak agi 26 lir saka asenok Naga nunger zülujang (alphabet)-bo Roman zülujang dang nungi ka agi tali 27 lir. Ibaji “ü” enoksemba ajanga lir. Tamalen asen tsürabur tashitemetettertemi ibai kanga shisa kaa apiteta inyakogo ta bilemer, kechiyong asenok oshi nung ojang (word) aika nung “ü” amshitsüsa adoker. Atangji, tanü asüng lanurtem aika Ao oshi sayuba kaketreju nung mazüngba agi, parnoki “ü” ya memetet, anungji ‘ü’ melen parnoki ‘u’ amshir. Ajisüaka, ‘u’ aser ‘ü’ na olasüji kenyongi balala, anungji oren zünga aodang olasü shitak madoker, anungji oren jagi shinüba tetezüjia mangatetter. Tatishitsü agi, ” nung” aser ” nüng” ta asüba ojang anaji olasü dang masü saka tetezüa balala lir. ‘Nung’ ta süra ‘into’ aser nüng ta süra ajibo tenüng (name) asütsü. Iba jagi, kodang asenoki asen oshi nung ‘ü’ mamshi lir, talisa, tangari asen zülujang olasüji kenyongi balaka adoker. Aiben, asenoki tangar bendangertemi aseni züluba zülumen (spelling) apia olasü adoka jembidang menütsür, kechiyong parnoki shitak madoker. Ibaji parnok tai masü saka asenoki zülujang shitak amshia zülumen (spelling) shitak mezüluba ajanga lir. Naga nunger rongnunga, asenok Aortem ya balaka, asenoki o jembidang, shitakba zülumen amshia ojang aser oren züluba amai ola jangjajangjaa adoka mejembir. Tatishitsü agi, ‘Merenba’ ta adoktsüba ser nung Mern ta dang adoker mesüra ‘Mokokchung’ ta jungjunga olasü adoktsüba ser nung ‘mokchun’ ta dang adoker. Züluba nunga tangar Naga kintemibo ‘ü’ zülujang ya kanga nendaka amshir. Tatishitsü agi, asenoki Chümoukedima ta asüba zülumen nung ‘ü’ melen ‘u’ amshira, parnokibo magizüktsü. Aji oda, Shürhozelie ta züluba tenüng nung asenoki ‘ü’ melenaji ;u’ amshira, ajia pa tenüng masütsü aser parnokibo kanga jashitsü. Aji oda, asenoka ‘Nüngsang’ mesüra “Süngit” ta asüba nisung tenüng ojang nung ‘ü’ melenaji ‘u’ amshira olasü dang masü saka tetezüa kenyongi balaka adoktsü, Ajisüaka, asenokibo itemji tangar Naga kintemi metsüngareta amshiba amai mamshir. Ashiko, itemji asenoki mazüng aser memetetba agi süokia ia mebilemer südi. Ao oshi tashimait adenbaji, asenoki zülumen nung shitakba zülujang amshitsüla mamshiba nungi tenzüker. Naga nunger rongnunga asenok Aortem-isa pei oshi aser pei sobaliba mejangraba amai reprangtetter. Iba jagi asenok ya Naga nunger-a masü aser English nunger-a masü ta tetsüngda nung kechi kin aser kechi nisungar ayak mejangjatettsüsa aika kümogo. Bendang lima nung mapa inyaker aser tazüngertem rongnunga asen o pi na medemdangra, Naga nungersa ser nung tangar kin nisungtembo pei kin sübosülemtsü agiba nunga meraketketa agir angutsü aser jembishinü nunga pei tetsü oshi agiang tajungba aser English aser Hindi oshi nungang tajungba ta jembiba angur. Itemji tenükshitsüka aser tangari itemji kanga meraketa repranger aser akümtsübur. Parnok denji asenok medemdangra, asenoki asenoksasa nümamedangtettsüsaba tia nung lir. Asenok nisung aikati Ao o mashi aser mezülutetter aser English oshi nunga oren kata shitak mezülutetter aser mejembitetter. Iba jagi balaka asenok aika mapa teinyaktsü manguba timtem ajurur. Tanü putu ya koba lima nung südir süaka, kin kidong aser liso jenjang jangjatepba mapang ka lir. Iba ama putu ka nung senso shia asoshi tongtibang kaji pei tetsü oshi aser pei kin sobaliba meteta alitsübaji kanga tongtibang kümogo. Kin shia lipok balala, anungji sobaliba ayaka balala, anungji peisasa pei lipok aser ayak meteta alitsüla. Asenok Aortem asoshi balaka, Ao oshi ya oshi dangbo masü saka ibai nisungtem nüchi kümdaktsüba ola ka lir. Iba oshi aser ola dak aketba tashi ainji mesamai tangar asoshia temoatsü süa maneni amshitettsüsa asenoki asen oshi züluba aser jembiba nung kanga temulung agütsütsüla. Atangji, kaketrejutem nung asen Ao zülujang mesayutsüa akok saka pei kin zülujang aser zülumen angazükdak tajungtibaji pei kidang asütsüsa tsüraburtemi temulung agütsütsüla aser arogo nunga tanurtem sentep aser Sunday school nung akok tashi Ao zülujang aser zülumen amshia Ao nung sayutsüsa arogotemi sentong yanglutsüla. Ibaji asen kin tamendakdak akangshiba mapa asütsü.