Zülumen/Ojang/Olong temetongshitsü kar

~ ER. C.Kazükaba Jamir, Dimapur.

Ni Yimyim aser Milen osang kaket nung zülumen, ojang aser olong aika metongshia amshitsü ocet zülua arudaki. Aikati tim ta angateta metongshiba asoshi kanga pelar. Ano maneni yamai metongshia amshi nung jungdisü ta zülur.
1. “Aoer” melen “Aor” ta amshidi
ASLB temsenyim – 1 Sl.No.1 ajiang
* Vowel agi tema aliba ojang dak “r” enoktsü
* Consonant agi tema aliba dak “er” enoktsü
* Tatishitsü – Ao=Aor, Tulu=Tulur , Taka=Takar,
* Metet=Meteter, Sangtam=Sangtamer, Chiyung=Chiyunger.
2. “Tu” melen “To” ta amshidi
ASLB temsenyim – 1 Sl.No.5(a) ajiang
* Taoba indang langka lepshia jembidang “to” ta amshir (tu yabo süngdong tu (leaves) lir. English alphabet dang meteter Ao alphabet pei sasa memelentsüla). Tongtipangsa osang zülurtemi (Journalist) to ta shidak zülutsüla.
3. “Tzü” aser “Tsü” bendanga metettsüla
ASLB temsenyim – 1 Sl.No.4(1)
* Ojang koba nungsa “tzü” (Water/Liquid) lir, item ojang nungji tzü amshitsü. Koba nungsa olasü tzü ama adoker, saka tzü (Water/Liquid) mait, item nungji tsü amshitsü ta lir. Ajangla parnoki toyuba ama asenokia amshitsü merangdi.
* “Tzükong” melen “Tsükong” ta amshidi. Tsükong dang English agi range ta ajar. Iba nungbo tzü (Water/Liquid) dena mali. Yabo abstract noun ka dang – kongshitsü makok. Aji asünung tang nungibo tsükong ta dang amshidi arung.
* “Tzüsen” melen “tsüsen” ta amshidi. Tsüsen ta asüba ojang ya verb ka lir (Tzü nung tsüsen) Ibaibo nouni inyakba mapa ka dang. Aji asünung tsüsen ta dang amshidi.
* “Tzümar” melen “tsümar” ta dang amshidi. Tzü tema nung alir ta bilema asen tsüraburi tzümar ta jatsü südi. Saka parnok ya tzü (water/Liquid) masü nisung dang. Aji asünung tang nungi tsümar ta dang amshidi.
4. Tanü asüng O tasen kar jembiba angashir aser osang kaket nunga züngshir. Tatishitsü agi – inyakdima, odima, merangdima, chiyungdima ano aika. Item ojang amshiba agi orenji mabensar aser angatettsü kanga tasak. Parnoki shinüba yabo – inyakdima tetezü- inyakdi arungma mesüra inyakdi ni ta shinür alitsü. Yamaji odima- melen odi ni mesüra odi arungma, merangdima- melen merangdi ni/merangdi arungma, chiyungdima- melen chiyungdi ni/chiyungdi arungma ta amshitsü merangangma.
5. “Anu” masü “Ano” ta amshidi. Tawa tanü osang kaket nung anu ta züluba ngua kanga süngmanger. Ao O zülumen pei zülunütsü melenshia mezülutsüla. English alphabet dang meteter Ao zülumen pei sasa memelenshitsüla. Zülumen pei sasa melenshiba yabo ABAM/ASLB-ia azüoktsüla.
6. “Lung” aser “long” bendanga amshidi. ASLB temsenyim – 1 Sl.No.8, ojang kobaisa lung (Stone) tetezü agütsür, item ojang nung lung ta amshitsü aser tanga ajak nung long amshitsü ta shia lir. Aji asünung lung (Stone) dak alaka tangabo yamai amshidi – olong, pelong, telongjem, longa ao, telonglong, longpen aser telongso.
7. “O mejir/mechir” melen “O meyiper” ta amshidi. Per (Snake) agi mechir, tetsüri tola mechir, an-i tsük/jang mechir aser teburi yong mechir ta dang angazük. Saka o mechir ta bo tang ang angashir. Mokokchung Tsüngrem mong mini hornbill benjong sentong nung o mechir ta ngua kanga panga-ogo. O ji koma mechitsü? Pei yimer/tsükong karibo jembia alitsü südi, saka Aor arok lokdi nungbo yamaji mamshi/meinok tajungba asütsü.
8. “Tongti tezülur” melen “tongti zülur” ta amshidi. Ojang karbo kodang pa kisüng züludir yamaji amshir (i.e,tezülur) saka kodang tanga ojang dak soloka (metaloka) züludir yamai melenshia zülur. Tatishitsü –
* Tongti tezülur melen tongti zülur
* Repsem tezülur melen repsem zülur
* Kaket tezülur melen kaket zülur
* Osang tezülur melen osang zülur
Tang nungi yamaji amshitsü merangdi.
9. “Amtsük” melen “amsang” ta amshidi. Akhi mapang tsüraburi am yanglur ibaji aam nung temer mimong nung tsüker achiba agi amtsük ta jaa aru. Tanü asüngbo bakery nung oven yanglur yangji awanger. Aser asenok kidanga am yanglur totzü nung sanger dang achir. Shingaia am mimong nung tsüker machir. Aji asünung amsang ta amshi nung tajungba asütsü. Kechiaser ibai mapa den tetezü kanga putepa lir.
10. “Makai” melen “mekai” ta mamshiteter no?
Ao oshi oben nung ojang aika grammar-i melaba ama amshiba/jembiba ngua kanga pelar. Saka ojang kar memelenshitetba agi anosa zülur. Negative ojang aika (i.e majung-mejungi, mali-meli-i, matong-metongi, makok-mekoki aser maden-medeni etc) ta present continuous tense nung shitak amshidaki. Saka maka ojang yabo kechiba mekai ta present continouous tense nung mamshiteter ni kanga süngmanger.
Ao kaket züluri pei-i züluba kaket nung mekai ta tense shidak zülutsür, saka ASLB-i makai ta melenshitsür. Parnoki tapak kar nungbo mekaiji mongujemi tokja lir. Iba jagi kaket kasa nung mekai/makai ta meyoktepa zülua aliba kaket aika nung züngshiogo.
Yimtsüng/tsükong kar nungbo makai ta amshia alitsü südi saka arok kaket ken O zülu nungbo grammar-i kechi melar aji dang amshitsü tim. ASLB-i “Tetsü oshi dangi meyipdi” ta nükjidong tajung yur, ojang kar grammar-i memelaba sulen anidaker no? ta sasa-a bilemtsür. ASLB züngsem/ketdangpur ajak melentepa inyaka aotsü alinung karibo angatettsü ta imla-a atar.
Joko Laishiba aser ken kaket nung makai ta enokogo, iba yagi tarutsü nung timtem ajurutsü südi ta tsübuseta bilemtsür, kechiyong lanur aika asen oshi nung research agir arudang grammar-i kechi toyur, iba nungji dang anidaktsü südi ta amanga atar.