Züngzünga inyaktsüla

Nagaland nung alir Naga nunger dak tashimait ka ajitetbaji mapabo inyaker saka züngzünga meinyaker. Iba jagi senbo endok aser nübobo atsük saka nüngdakbo mataloker. Aji oda, tanü sorkar school mejungi akümba ya ketdangsertem mesüra tesayur majungba agi masü saka nendaka meinyakba agi lir. Mapa ajak nung nendaka inyaktsübaji department ka nung tematiba nungi tilatiba tashi nüngdaker. Aji oda, department nung süli, lokti nung süli tongti ketdangseri mapang amshiba nungi tenzüka office takdang junga ayuba tashi aser maparen ajak nung kanga nendaka züngzünga inyaktsübaji kanga tongtibang lir. Kodang mapa inyakdak tongtibai anir ajaki züngzünga inyakdir, mapaji kanga junga atemer aser takidak akar. Aji oda, office ka nung ki aoker kati kodang  ki takdang tema aser telong ajak kanga nendaka aser züngzünga okdir, iba jagi office tobur ajung dang masü saka yangji mapa teinyaknütsüka kümdaktsür. Iba amaji office nung inyaker kari mapa anünga meyui tanü mapaji tanüsa temer file shitak nung züngzünga inyaker toktsüra, iba jagi mapa inyaka aodang melamelaa fileji bushiteta inyaker. Iba kasaji mozü kidanga osettsüset alia ayuba nungi  shir yipten tashi nung züngzünga mesüra osetbo ali saka tamshitsüla masü kümadoktsü. Tanü asenok gari lenmang tesem teimbaka nung majung asüba ya lenmang meyangluba agi masü saka lenmang yangludang züngzünga mereprangba aser züngzünga meyangluba agi lir. Iba amaji aluyimertem asoshi sorkari mapa tajung aika inyaktsür saka züngzüngabo kata meinyaker, iba jagi aluyimba jenjang tajungba makümer. Tanü asen lima nung tesem aika nung aonsutsü tapu balala kanga junga adokdaktsür, ajisüaka itemji meyokma tashi tamajung mekümdaktsüi mekonga ayutsü asoshi ‘cold storage’ maka takoksa angur. Ashiko, ibaji meyangluba agi masü saka yanglutsüba mapang züngzünga meyangluba agi asütsüa akok. Atangji, item ama tongtibang mapatem nung züngzünga meinyakbaji pei lima aser nübortem asoshi mebilem pei kija ajangzüktsü bilema inyakba agi asütsüa akok , ajisüaka asenoki angatettsüba mapa kaji kodang asenoki mapa ka nung züngzünga meinyaklir, iba jagi asenok timtem aser takoksa ajuruba dang masü saka lendonga tulu ajurutsü. Aji oda, nisung kari ki yangludang züngzünga masü yangluba ajanga iba kiji chirepa tesama tulu ajurutsüa akok. Iba amaji nisung kari gari lenmang nung apu atemdang züngzünga metemra, ibaji ajanga tesüidak nung apuji chirepa lendong ataloktsüa akok. Ano, mozü kidang balaka anepalurtemi shirangertem anepaludang züngzünga meinyakra, ashiko, shiranger nem mozü aitepa chidaktsütsüa akok mesüra operation meshidak agitsüa akok . Iba ama mapa nungji balaka doctor aser nurse-tem ajaki kanga züngzünga inyaktsü nüngdaker. Mozü meshitaki chidaktsüba mesüra operation meshitaki agitsüba ajanga nisung südaktsüra, shibai koma menoktsü ? Aji oda, asenok kechi wadang nung inyakdir inyakaka kechi inyaker (?) ta masü saka koma inyaker (?) ta asübajiang tongtibangba lir. Joko, asenok ya mashimashi alitsüba putu masü kechiyong ibai tajungtibang asütsü toktepba putu ka lir. Aji oda, kechi inyakdir inyakaka züngzünga inyaknungang tajungtiba sütettsü. Züngzünga inyakba  nung timtem lir, mapang talangba agitsüa akok, nübo aser rongsen teimba endoktsüa akok saka züngzünga inyakbaji dang tanü aser asüng asoshi tagitsü asütsü. Tanü asenoki asenok kidang aser school nung tanurtem dang züngzünga sayutsü melen mashimashi sayura, asenok tarutsü anogotemji mashimashi asütsü, anungji tanü dang nungi timtatemba atemtsü. Tanü asenoki aluyimbatsütsüa züngzünga mesüi mashimashi ka inyaker yutsüra, aluyimer ser nung tanü ama teti tangar lu nung züsentetba dang alia chiyonga alitsü. Iba tia nungi asenok adoktsü atema asenoki inyakba mapa ajak züngzünga kanga junga inyaktsüla.