Zunheboto DC Shanavas aser SDO(C) Relise na den tepila sentong agi

July 3, 2019 nü Zunheboto town hall nung Zunheboto DC menden nungi anensang, Shanavas C, (IAS) atema atepila sentong agidang tangokba noksa nung angur. 

Zunheboto, July 03 (TYO): July 3, 2019 nü Zunheboto town hall nung Zunheboto district-i Zunhebto DC nungi anener, Shanavas C, (IAS) aser SDO(C) Relise Sangtam na den tepila sentong ka ayongzüka agiogo, ta ketdangsertem osang ka ajanga metetdaktsü.
Iba sentong ya Zunheboto EAC, James Renbi Kikon leniba nung agi aser T.L.Kiusumong, ADC Satakha, T.Uniel Kichu Ao (IPS) SP Zunheboto, Khetoshe PS to DC, Shikato Hd. GB(Sadar), President Sumi Hoho aser President Sumi Kukami Hoho nungeria o tatsütsü jembia liasü.
Tepila o jembidang ketdangser anaapronglai Zunheboto nung aliba nüburtemi maparen ajak nung parnok den amalitepa inyakba atema pelaba lemsatep.
Ketdangser anati, ajak longjemer inyakra terenlok alir; tenati meranga tajungtiba agi inyakaka mapa ajak renema meinyaktet, ta ashi.
Tenatisa nüburtem dang DC aser SDO tasenba den-a amalitepa inyaktsü mepishia liasü.
Tenatisa, parnoki district menungraseta yutsür aor aser tarutsü nung tanaben Zunheboto-i meyipa arua inyaktsü imlar, ta ashi.