Zunheboto District Hospital nung TrueNat amenokogo

Zunheboto District Hospital nung June 7, 2020 nü COVID-19 tendangba machine, TrueNat amenlokba yangi noksa nung angur. (IA Zunheboto)

Dimapur, Aami/June 08 (TYO): Zunheboto District Hospital nung June 7, 2020 nü COVID-19 tendangba machine, TrueNat amenokogo.
Iba machine amenoktsü asosho nisung telok ka Zunheboto-i June 7 nikongdang aru aser kasa anogoshi mapa tembang.
Iba machine amshitsü asoshi technician ana nem training agütsü aser sample asem tendanga liasü. Saka Zunheboto nung coronavirus sample tem ya June 9, 2020 nü nungi ang tenzüktsü, kechiaser tendangba shidak ngutettsü aser sample/tendangba meraksatsü asoshi maparen kar inyaktsü lir, ta sangdong ka ajanga ashi.
Zunheboto nung May 29, 2020 nü sample 30 tashi COVID-19 tashidak tendangtsü asoshi yoka liasü aser sample ka nunga iba tashidak meputet. Tang tashi iba district nungi coronavirus tashidak nisung ka daka puteta mali aser tawa bendanglen nungi shilangertem dak nungi sample bendenba mapang lir.