Zunheboto district nung 2 buba ITP tenzükogo

Dimapur, May 16 (TYO): May 15, 2017 nungi Zunheboto district kübok group B aser C government employees tasentem atema 2 buba Phase Induction Training Programme (ITP) tenzükogo.
Iba sentong ya Deputy Commissioner indang Conference Hall nung agir aser Department of Personnel & Training, Government of India-i teyari agüja Administrative Training Institute (ATI), Kohima-i District Administration, Zunheboto den yaritepa ayongzüker.
ITP tenzükba sentong nung ATI Secretary & Director, Lithrongla G Chishi IAS-i o jembidang, “group “B & C” employee temji sorkar ketdangsübaren nung tongti shilema agirtem lir” ta ashi.
“B & C” employee jagi nübortem den indangindanga maparen inyaker aser iba jagi nenoki yimyayimpong tajung amshitsüla aser temulung agüja mapa inyaktsüla, ta Lithrongla-i training agirtem ayongzük.
“Nenok jungjunga training magi nungbo, nenoki mapa shitak meinyaktettsü. Iba training nung adenba ya amajok masü” ta laisa shisem.
Iba sentong nung EAC Nockpai Konyak-i tesentepertem pela agizük aser ITP Zunheboto District atema Progrmme Coordinator, Dr. Alem W. Longchar-i training indang temetettsütem metetdaktsü.