Zunheboto DPDB senden agiogo

Zunheboto, Tsüklai/February 12, 2021 (TYO): Brehostibarnü (11.02.2021) Vice Chairman, DPDB aser DC Zunheboto, Peter Lichamo lenisüba kübok, Deputy Commissioner’s Conference Hall nung Zunheboto DPDB senden agiogo, ta sangdong ajanga metetdaktsü.
DPO (RCH & UIP) Dr M. Nukshisangla Jamir-i District nung tang tagidak aliba COVID-19 vaccination dak sendakba nung telok dang tongmelang agi rasa ashi aser tajangzük angutsüpur 771 nungi health workers 491 nem Covid-19 mozü agütsüogo, ta lai metetdaktsü.
Health care workers atema tanabuba vaccine shilem ya February 16 nungi 22, 2021 tashi session tesem ajak nung agütsütsü, ta lai shilem. Laisa, department tem talisa Revenue, Prison, Police Reserve, Home Guards aser Civil Defence, koba frontline workers kübok aiter item atema sensitization sentong ayongzüktsütsü, ta ashi.
Tanabuba vaccination drive shilem, koba February 10 nü 32nd Assam Rifles Battalion nung agiogo, tajangzük angutsüpur 97 nungi nisung 88 nem mozü agütsüogo, ta lai ashi.
Tawa tembangba IPPI aser Indra Dhanush schemes dak sendakba nung lai tongmelang agi telok dang rasa shiogo.
CMO Zunheboto, Dr K. Akaho Sema-i, vaccine agitsü atema nübur dang metetdaktsütsü, iba vaccine ajanga teyari agütsüba nung temulung alemtsü aser wara ano süshia maoba aser social media den sabang balala ajanga Covid-19 vaccine dak sendakba nung mejangjaba osangtem prokba mamangtsü mechi nüburtem saksalema lidaktsütsüla ta board ayongzük.
District nung Covid-19 vaccine agütsü tenzüker külen nungi iba mozü agirtem kangshiba mesüra tanga timtem agütsüba osang kecha mali, ta pai metetdaktsü.
Kasa senden nung, board-isa PWD, Agri aser teloktep department kübok teinyakdak aliba state aser central project tem, Zunheboto aser Mokokchung districts aser Zunheboto aser Kohima NST bus service tem indang asadanga jembiogo, ta kasa sangdong nung shia lir.