Zunheboto DPDB senden amen

Zunheboto, Lurio/December 11 (TYO): Ita shia amenba Zunheboto district Planning and Development Board senden December 11, 2019 nü Tizu river ayong nung Zunheboto DC aser Vice-chairman DPDB, Peter Lichamo leniba nung menogo, ta ketdangsertem osang ka ajanga metetdaktsü.
Taoba senden nung lemtetba onüktem reprangshiba sülen board-i Akuluto nung SDEO office upgrade asütsü aser DC Hill (east) Zunheboto nung Government Primary School tasen ka amenoktsü atema sorkar matsüngdang benoktsü lemtetogo.
Board-isa taruba Republic Day 2020 atema mapalem asoshi o lemtepba sülen departments nem mapa balala lemzüktsü.
DPDB züngsemtem tenüng nung DC-i Advisor CAWD aser NSDMA, Kazheto Kinimi-i iba senden atema sponsor asüba asoshi pa dang pelaba lemsatep.
Paisa Hovishe Arkha-i par farm nung iba senden amentsü melaba atema pelaba lemsatep.
Taruba DPDB senden January 17, 2020 nü DC’s Conference hall nung anüngdang 11:00 ako nungi amentsü.
DC-isa züngsem ajak dang pelaba lemsatepba den külemi tepela Khristmas salem lemsatep.