Zunheboto nung 29buba ZASA asayamung tenzükogo

January 27, 2017 (TYO): 29buba Zunheboto Area Sports Association (ZASA) asayamong January 27, 2017 nungi, Zunheboto Local ground aser Indoor Stadium nung asaya tenzükogo. Asayamung tenzükba sentong nung Vice-President, Sumi Hoho aser taoba Zunheboto Town Council Chairman, H.Khehoshe Yepthomi tongti tesemdanger liasü.
Iba sentong nung jembi dang pai ZASA tenzükertem tenüng asang. ZASA-i Zunheboto temüket nung aliba lanurtem asoshi saisapong ajungkettsü asoshi lenmang sadema lapoktsüba asoshi pai parnok tenüng maneni asang. Saisapong nung shilem agirtem ajaki temaba jenjang tongtettsü asoshi meranga asayatsü, aser ZASA-i sentong tajung ayongba amajok mekümdaktsütsü asoshi ajungshi.
Zunheboto Area Kukami Hoho (ZAKH) tir, Vikaho T. Zhimo-i, loktii parnok dak nungi imlaba ama alitsü asoshi ajungshi. Maneni pai ZASA nungita asemba shisem.
Iba sentong Games & Sports Secretary Mughaho Zhimo lenisüba kübok agi. Sentong nung, Shikato Sumi Advisor, ZASA-i tesentepertem pela agizükba o jembi aser tir Kihoyi Z. Zhimo-i tayongzükba o jembi. Botokali Yeptho-i ken ka ajanga telok ayongzük.
Iba asayamung anogo ana munga yimtsüng 17 nungi Volleyball aser badminton asayatsü.