Zunheboto nung angati Dental Camp ayongzük

Dimapur, Tsüklai/February 12 (TYO): Indian Dental Association Nagaland State Branch (IDANSB), Zunheboto unit ajanga Community Dental Health (CDH) Programme nung shilem ka ama February 12, 2021 nü District Hospital, Zunheboto nung angati Dental Camp ka ayongzüka liasü.
Dr. Lanuchuba, Medical Superintendent, District Hospital, Zunheboto ajanga iba sentong tenzükdang o tatsüka jembiba mapang dental, oral health aser hygiene indang jembia liasü.
Dr. Esther Ngullie, Dental Surgeon, District Hospital, Zunheboto ajanga iba camp indang tongmelang agi rateta ashi.
Tebo anepaluba facility alidaki aotsü tasak, talisa yimtsüng aser meta talang nung timtema alir nem angati denture (artificial teeth) agütsütsü nükjidong nung iba camp ya ayongzük, ta lai ashi.
Iba sentong tenzüka Shotomi Baptist Church indang pastor, Kiyelu-i sarasadema liasü.
Iba camp nung nisung 21 tashi tajangzük balala agia liasü. Camp ya Dr. Esther Ngullie, Dr. Tohito Kinimi, Dr. Loni I Chishi aser Dr. Akaholi Zhimo nungeri anir agia liasü.