Zunheboto nung Biological Diversity day among

Dimapur, Monupii/May 23 (TYO): Alima ajunga den külemi Zunheboto district nung May 22 nü Centre church SBAK, Nito Mount, Zunheboto nung ‘Our Biodiversity our Food our Health’ omen nung ajemdaker International Biological Diversity (IDB) mungogo. Iba sentong ya Sumi Baptist Akukuhou Kuqhakulu (SBAK) Nito Mount aser Nagaland State Biodiversity Board (NSBB) na sentepa ayongzük.
Sentong nung Zunheboto Deputy Commissioner, Shanavas C, IAS alakteta jaoker ama arua aden aser sentepa aliba nüburtem dang taküm liyonga aotsü asoshi aser taruba putu tajungba kümdaktsütsü atema inyaktsü ayongzük. Paisa, tzümopung aser arem shiruru wazüka ayutsü atema ango apuba aser arem shiruru akhaba nokdangtsüla mesera khenyongi nokdangadoktsüla, ta ashi.
Sentong nung shisalen agütsürtem ya Forest Range Officer, Savinuo Kikhi-i anir shilem agi aser parnoki International Biodiversity Day ya biodiversity ken o ajungkettsü atema UN-i ayongzükba international anogomung ka lir koba küm shia May 22 nü amunger, ta rasaa ashi. Taküm omen ‘Our Biodiversity our Food our health’ ajanga asenok chia ajemba yimya, nutrition aser health ecosystem dak sendakba nung shisatsü agütsütsü nükjidong yur ayongzük, ta paisa ashi.
Biodiversity koda menener, raksatsür mesera tarak kettsü aser item tebilemtsü ya koda nokdangtsü mesüra yanglushitsü item amala onük tem nung ajemdaker shisatsü agütsü. Tongtibangsa Biodiversity Management Committee (BMC) dak tali rangloker tesayuba agütsüogo. Iba onük kübok local body ajaki koda parnok telongtet nung BD section 41 kübok BMC tentettsü iba indang tesayuba agütsüba den iba lokti tentet ajanga conservation sustainable use ajungkettsüba aser biological diversity mangaoka ayutsüba tesayuba agütsü.
Iba sentong nung GB, village council chairman aser Arogo nung lenirtem arua aden aser Rev. Hukugha Zhimo, ES, SBAK, Nito Mount-i parnoki pangzüng ayuba ka zünga metetdaktsü. Pangzüng rongnung tzü mopung wazüka ayutsü atema Arogo shia nung küm shia anogo ka shimteter süngtong atema mapa inyaktsü; Arogo shia nung jana bendenba tepong ana ayutsü; plastic bag mesüra plastic agi yangluba osettem mamshitsü merangtsü densema lir.
Team lenir Tizu Valley Biodiversity Conservation aser Livelihood Network, Ivan Zhimomi-i tepela anküp o jembia liasü, ta ketdangser sangdong ka ajanga metetdaktsü.