Zunheboto nung COVID-19 atema tanur kati tenla agütsü

Dimapur, Rongchii/April 06 (TYO): Novel coronavirus den raratsü asoshi nisung aser lokti tentet balala nungi tenla aika agütsüba mapang tanur Kitheka I Khujumi-i tenlaba ngua Deputy Commissioner, Zunheboto, Peter Lichamo temolung nung kongshi. Arishi küm 7 teburchanu Khujumi ya tekolok techira aser kanga sasapelar lir, aser alima ajunga nung coronavirus tashidak wara agi sünger nisung meimchir kangshiba angazüka aser district nung nüburtem tim atemba ngua pa indang pocket money tenla agütsü.
Sangdong ajanga ashiba agi, Khujumi ya taküm bicycle ka alitsü atema sen bendena liasü saka pai mapa tajung inyaka coronavirus tashidak wara den raraba nung yaritsü asoshi pai bendena aliba sen tenla agütsü. Mapa tajung asoshi tarutsü anogotem nung pa tali moajang aser pa inyakba mapa tajung ajanga aika ajungmesotsü imlar, ta District Task Force for COVID-19 Zunheboto ajanga sangdong ka nung ashi.