Zunheboto nung District level Assessment camp katsüogo

Dimapur, Monupii/May 20 (TYO): Zunheboto district kübok EBRC hall nung May 20, 2019 Hombarnü mata mabensaba tanurtem atema District level Assessment camp ka ayongzükja liasü.
Nagaland Education Mission Society, Department of School Education kübok District Mission Authority (SSA) Zunheboto-i iba sentong ya ayongzüka liasü.
Deputy Mission Director, Tali Jamir-i anir team kati iba camp achaayanga agi. Par team nung NRRC Dimapur nungi Prosthetist & Orthotist Wati Jamir aser Star Key, New Delhi Head-IB Vinay Bishan na densema liasü.
Sentong nung Tali Jamir-i jembiba ashiba agi, iba assessment camp ya arishi küm 6 nungi 18 tsüngda mata mabensa tanurtem yaritsü aser angati check-up den hearing impairment devices den tanga osettsüsetem agütsütsü nükjidong nung ayongzüker.
Hearing aid tem koba yimya nung amshitsü, iba denji kümdanga amshira mapang talangak amshitettsü aser item device ya USA nungi aruba jenjang aketba osettem lir, ta Tali-i rasa ashi.
Tanurtem shirnok tetsüng mesüra teka rangdoker lir, parnok nema takaratiba nung angati agi artificial tetsüng/teka mesüra tanga osettem agütsütsü, ta Tali-isa shisem.
Iba District level Assessment camp sentong nung tanur parnok ajak agi 30 aruagi denogo aser tanur 9 nem angati hearing device agüja liasü, ta DPRO sangdong ajanga metetdaktsü.