Zunheboto nung Global IDD Prevention Day sentong agi

Dimapur, October 21 (TYO): District Health Society, Zunheboto-i ayongzüka October 21, 2017 nü CMO Office, Zunheboto nung “Observance of Global IDD Prevention Day” mongogo.
Iba sentong nung shisalen sayur, Dy. Chief Medical Officer, Zunheboto, Dr. Hoito Sema-i Iodised metsü aser Iodine Deficiency Disorders indang lemsatepa liasü.
Dr. Hoito-i, nisung ka junga aintsü, temang junga renloktsü aser tokolok o temang napronglai mapa junga inyaktsü atema Iodine ya nüngdak, ta ashi.
Paisa, mashisa aliba tetsür ka dak iodine peria melira tanur sopet-sora asotsü-a akok, ta ashi.
Dr. Hoito-i, dokan oset shishirtemi iodised dang alizüka ayoktsüla, ta ashiba den külemi non iodised salt ya PFA Act 1954 kübok nokdangogo, ta metetdaktsü.
Sentong nungsa IEC materials angati lemja liasü aser Iodine tendangba indang tesayuba agütsü.
Iba sentong dak sendakba nung school tem nung Quiz aser otsüno tetoktepba ayonga akatsü.
Iba sentong ya DPM, Vitoli leniba nung agi aser Kakiye Swu-i temoatsü meshia sarasadema liasü.