Zunheboto nung Gutkha product tem nokdanger

Zunheboto, Chiteni/July, 02, 2019 (TYO): Zunheboto district nung July, 01, 2019 nü nungi tenzüka gutkha product tem mayoktsü asoshi Zunheboto Deputy Commissioner-i tetuyuba agütsüba den atonga, June 02, 2019 Mongolbarnü Zunheboto Chamber of Commerce & Industries (ZCCI)-i jila tesem balala nung mita ao aser nokdangba gutkha product aika ngutet, koba nübur matsüngdang item ajungaji rondokja liasü, ta DPRO sangdong ka ajanga metetdaktsü.
EAC Ane Khieya aser EAC M. Khenpa nati anir District Administration den ZCCI züngsem, Dobashis, kaketshir telok aser police tem lemsar Zunheboto jila kübok tesem balala mita ao.
Iba ama tenokdangba oset tanaben ayokba putetra, item oset (gutkha) raksatsütsü aser la/pa ket nungi putetba oset jenjang anasü agi talila temonok meshitsü. Ano kasa aibelenba nung tasembenbuba apu nungbo gutkha temji raksatsütsü aser la/pa ketdangser ket nung bendang agütsütsü.
Maneni, Zunheboto nung nüburtem jenjang tajungba atema nüburtem longjemre iba mapatong takokleni bener aotsü asohi ZCCI-i mepishia liasü, ta kasa sangdong nung ashi.