Zunheboto nung “SPARSH Leprosy Awareness Campaign” tenzüktsüogo

Dimapur, Tsüklai/February 12 (TYO): National Leprosy Eradication Programme (NLEP) kübok Zunheboto, CMO Office nung February 8, 2019 Hokolbarnü “SPARSH Leprosy Awareness Campaign” sentong lapokja liasü.
Iba campaign sentong ya Dy. CMO, Zunheboto Dr. K. Akaho Sema-i lapoktsü. Sentong agiba mapang den repsema Zunheboto district kübok aliba NLEP staff ajak den senden ka ayonga agia liasü.
Sentong nung jembiba mapang Dr. K. Akaho Sema-i, lokti nung chitemra keta alirtem züdoka aoba mesüra temang nung aketba meputetti aliba mesüra tashidak meimshiba tem metettsü atema itemji mapang shia semdanga aser tendangtsü asoshi NLEP staff tem ajungshia liasü.
Iba denji külemi, chitemra tashidak report tem mapang apitetter ita shia agütsütsü atema pai tetuyuba agütsü.
Paisa, 2019 nungi 2020 tsüngda tashi takaratiba nung inyaka aotsü atema ita shia inyakyim aser asalentongtem sayutsü asoshi staff nem tajungshiba agutsü.
India nung chitemra tashidak samadaktsüogo, ajisüaka pei wadang senzüka meyutsütsüla ta pai ashi. Iba den külemi lokti tenzüktsü atema pei akaba sempet tajungtiba agi nendaka inyaktsü asoshi Dr. K Akaho-isa tayongzükba aguja liasü.
Kasa sentong nung Zunheboto district alema orr tanga tesem nung chitemra aketter atema inyakyim balala takok ngua bener aoba indang Huzambo, NMS (NLEP)-i rasa jembi.