Züsenba nung temulung agütsüdi

Züsenba agi dang chiyongtsüa angutsü aser tanga nüngdaka peritsüsa rongsen lenmang lapoktsü ta asenok ajaki meteta lir, saka asenoki züsentettsüba nung ya temulung magütsür.Iba jagi government teyari agia alu ayimtsü melen mesüra senotsü ajangzüktsüsa senotsü arulen mapa ka apiteta inyaktsü melen, asenok aikati yim süngküm (village gate)-ang tajung ka yanglutsü mesüra senden alidak ki(Community hall)-ang tajung ka asütsü indang jembir.Atangji, itemjia tongtibang, saka yimtaklirtem kidangbo kecha maka ser yim süngküm mera aketba jagi mesüra senden alidak ki tajung tuluka yanglua ayuba jagi nübortem tajangzük mangur. Ashiko, yimtak makamaitba agi ochishia melitet, aiben yimtak senden reju nungji ken o-ang tasak jembitsüsa akümtsü mesüra senden rejuji raratepdak tesemang ka kümadoktsü. Takartema züsenba nung temulung magütsüra repranga lia sensaker akümtsü aser sensakertem alar akümtsü, anungji, asenok ama sensaker lima nungbo tamasa kibong ajak züsenba nung temulung agütsütsü tim. Züsenba tetezü asen nübo, mapang aser rongsen endoka inyakba yari tajangzük meyipa angutsüba mapa lir. Aji jangratemtsüka. Tzümartembo ajak züsenba mapa ka mesüra kabosa inyaka asenoki ajurutsü. Aji oda, kodang asenok ajak züsenba maparen langka nungbosa amdaka lidir, asenokji kanga mazüngba kibong aser nisung akümer aser aseni züsenba mapa jagi asenok nem teimla agütsür. Kodang züsenba mapa nung mazüngi lidir, tamajung jembitsü aser tamajung inyaktsü tebilema mebilemtsü. Tang yabo asenok aika kecha meinyak kazürtem dang lir. Iba jagi lokti nung tali meputep adoker, kechiyong kecha meinyak kazürtemji o züsener (o lu ayimertem)lir.Züsentsüba yabo tazünger mazünger ta kecha mali, ajak peii metetba aser azüngba aser peii jangraba yari inyaktsü. Aji oda, tuluka zünger kecha mezüsen kazürtemjibo alima nem timtem agütsür asütsü, ajisüaka mazüngyonga pei metetba aser jangraba mapa ka tenzüka senzüra, tanü noklangka aabaji asüngbo ana aatsü, asem aatsü ta azükarua aotsü.Tanü putu ya peisasa züsenteta (entrepreneurship)takar akümba aser tangar nema mapa agütsütetba putu lir. Ibaji meteta asenokbo tajangzük lepa manguba mapa nung masü saka asen nübo aser mapang endoka inyakba yari, asenoka asen nüngdak peria tajangzük angutsüsa züsenba mapa langkabosa tenzüka inyakdi.Aji oda, na kechi inyaker (?) ta tangari asen dang asüngdangdang, asen telangzütsü tejangja ka makatsüsa asenok melili.