Zverev-i Munich Open Title tanaben koktetogo

Monupii (May) 7, 2018 (Agencies): Taruba ita French Open atema terenemshiba ka ama Alexander Zverev-i taküm küm atema mezüngbuba title, Munich Open nung koktetogo. Pai iba asayamung final nung külem lisopur asayar Philipp Kohlschreiber 6-3, 6-3 agi koka liasü.
World No. 3, Zverev ya taoba küm French Open nung mezüngbuaba round nung tsükadok aser taküm pa asaya ajungkettsü asoshi kanga jangraa asayaba mapang ka nung pai Munich Open küm anabuba atonga koktetogo. Pai tang tashi nung ATP title tenet kokteta lir.
Iba asayamung asemben tashi koker alisang, Kohlschreiber-i mezüngbuaba 3-2 agi tejakdang sür asayaa liasü, saka Zverev-i kanga junga asayaa game asem tashi atonga koker mezüngbuba set akok.
Tanabuba set-a taoba set ama kasa yimya nung asaya, ajisüaka Zverev-i arishi küm 34 tain asayar dang nungi tajungba asayateta title koktetogo. Asaya nung tena pronglai game asemsem koker liasü, saka iba sülen tanungba game asem Zverev-i atonga koka pai tanabuba set akok.
“Ni Munich nung title ka koktetba atema kanga pelar. Ni Monte Carlo nunga kanga junga asayaogo aser maneni junga asayaa aotsü imlar,” ta Zverev-i ashi.
Arishi küm 21 tain asayar yagi Rongchii/April nung Monte Carlo Masters semi-final tonga asayatetogo.